A Semente acha que as crianças tenhem direito antes de tudo, de viverem experiências prazenteiras. Infantil é um período de muita importância para a vida futura da criança e é nesta etapa que se devem realizar as ações de desenvolvimento psicomotor, o desenvolvimento inteletual, físico moral, estético e afetivo da criança, garantindo-lhe o desenvolvimento da sua personalidade, das suas competências cognitivas e da capacidade de se relacionar com as outras.
Na Semente as crianças tenhem o direito de brincarem como forma particular de expressom, pensamento, interaçom e comunicaçom infantil, bem como o aceso aos bens socioculturais disponíveis, ampliando o desenvolvimento das capacidades relativas à expressom, à comunicaçom, à interaçom social, ao pensamento livre e criativo.
A pedagogia
Nas Sementes, todas as actividades som desenvolvidas em galego, favorecendo a aquisiçom, conservaçom, cuidado e consolidaçom do nosso idioma. Entendemos a língua galega e o seu carácter internacional como parte indissolúvel da nossa cultura, da nossa história e do nosso futuro.
As Sementes som um espaço de pedagogia transformadora que entende a educaçom como parte integrante da sociedade; pretende servir aos interesses populares garantindo um processo de aprendizagem democrática e fazendo possível que as crianças sejam cidadás livres e críticas.
As Sementes som um espaço de criatividade e inovaçom onde, através do pensamento criativo ou lateral som proporcionadas as ferramentas necessárias para o desenvolvimento das capacidades artísticas e a imaginaçom das crianças. Com o pensamento criativo as crianças observam as situações e os problemas de todos os ángulos possíveis podendo gerar, com criatividade e inovaçom, mais de umha resposta para resolverem diferentes questões.
As Sementes som um espaço laico. A educaçom laica representa a liberdade de consciência e do direito humano, da toleráncia e da democracia. Umha educaçom livre de qualquer imposiçom, propaganda ou doutrinamento religioso.
As Sementes som um espaço de coeducaçom. Um espaço de educaçom integral para as crianças com umha educaçom baseada na igualdade de género em todos os aspectos da vida. Um espaço nom patriarcal e sem machismo que favorece o caminho das nossas crianças para o empoderamento, quer dizer, para assumirem o controlo da suas próprias vidas.
As Sementes regem-se por assembleia, um modelo de decisom em que participam dumha forma horizontal pais, mães, professoras e crianças. A educadora ou educador e as famílias mantenhem umha relaçom direta e de confiança no que respeita à educaçom conjunta das meninhas e meninhos.
As Sementes som um espaço para umha educaçom inserida na natureza em que as crianças percebem os valores ambientais da nossa terra mediante a interaçom com o ambiente, através das saídas, roteiros, uso da horta, etc. Mas também no próprio espaço da Semente favorecendo o uso de materiais reciclados ou o consumo responsável.
As Sementes defendem a liberdade responsável, o respeito e a autoregulaçom; a educadora ou educador confia plenamente na criança; respeita-a como pessoa respeitando também as suas emoções, tentando proporcionar as ferramentas para elas solucionarem os seus conflitos por si mesmas. Tenta-se favorecer a plena consciência por parte da criança da sua liberdade, mas também da existência de uns limites básicos de respeito a outras pessoas e ao seu contexto.
As Sementes som um espaço educativo interactivo onde a pessoa educadora é umha mediadora que acompanha a criança no seu processo de aprendizagem; a relaçom pedagógica consiste no provimento das condições em que educadora e criança podam colaborar para fazerem progredir essas trocas que favorecem o desenvolvimento integral dos pequenos e pequenas e a aprendizagem mútua.
Nas Sementes a relaçom entre professorado e estudantes convive num mesmo plano de entendimento e respeito mútuo. É mediante o amor, a compreensom e a empatia que pais, mães e professorado melhor podem levar estes princípios à criança.
As Sementes som um espaço de interculturalidade onde as crianças compreendem a importância e o respeito de outras culturas que vivem no nosso país e que permitem interagir, crescer e trabalhar conjuntamente.
As Sementes som espaços abertos à comunidade, que se preocupa com a realidade do bairro e da vizinhança, tratando-se portanto dumha educaçom ligada à realidade do povo.
A Semente Vigo
Sob a forma de Centro de Ócio, o nosso projeto fai-se realidade no bairro de Teis, em Vigo. Está situado na rua Doutor Corbal 102, e conta com espaços adequados às idades e com umha horta de máis de 100m².
O centro infantil da Semente é um espaço que favorece o desenvolvimento mental, psicomotor, afetivo e sensorial a través de atividades ludicas-educativas, dinámicas e criativas; potenciando a integraçom social, igualdade de género, a cooperaçom e o conhecimento e respeito com a natureza.
A Semente Vigo está pensada para o periodo de 2 a 6 anos e está organizada por recantos possibilitando umha ampla variedade de jogos livres e atividades programadas que as crianças podem escolher.
Temos o recanto da lógica-matemática, o da música, o da leitura, o da experiência, o de agochar-se e o do movimento, tornando a Semente Vigo num espaço vivo, alegre, divertido, criativo e acolhedor. Também se pode descansar quando for preciso, respeitando assim os ritmos das nossas crianças.
